Latest Highlight

မြန်မာမွတ်စလင်များ၏ သာသနာရေးဆိုင်ရာနှင့် အိုးအိမ်များ အဖျက်ဆီးခံရမှုအပေါ် ပြင်းထန်စွာ ကန့်ကွက်ခြင်း



၁။ အမိမြန်မာနိုင်ငံတွင် ဒီမိုကရေစီ၊ လူ့အခွင့်ရေးနှင့် တရားဥပဒေစိုးမိုးမှုများ တိုးတက်လာမှုကြောင့် တိုင်းရင်းသားများပေါင်းစုံ ရဟန်းရှင်လူပြည်သူများက မျှော်လင့်ချက်ထား ဝမ်းသာအားရဖြစ်နေရသော ယခုလို အချိန်အခါမျိုးတွင် ကျောက်ပန်းတောင်း၊ ဆိုင်းတောင်(ကချင်ပြည်နယ်)နှင့် ကံမမြို့များတွင် မြန်မာမွတ်စလင်များ၏ သာသနာရေးဆိုင်ရာ အဆောက်အဦးများနှင့် အိုးအိမ်များကို ဘာသာရေး အဓိကရုဏ်းဆန်ဆန် လူစုလူဝေးဖြင့် ဥပဒေမဲ့ တရားလက်လွတ် အနိုင့်အထက် ဖျက်ဆီးခဲ့ခြင်းများကို မြန်မာမွတ်စလင် အစည်းအရုံးက ပြင်းထန်စွာ ကန့်ကွက်လိုက်သည်။

၂။ ရှေးမြန်မာမင်းများခေတ်၊ ဗြိတိသျှအုပ်ချုပ်ရေးခေတ်နှင့် လွတ်လပ်ပြီး မြန်မာနိုင်ငံတော်ခေတ်များတွင် တိုင်းရင်းသားများအဖြစ် တရားဝင် အသိအမှတ်ပြုခံထားသော သမိုင်းအထောက်အထား အထင်အရှားရှိသည့်အပြင် မူလဘူတ မြန်မာ့တိုင်းရင်းသားလူမျိုး (၁၄၄)မျိုးစာရင်းဝင် မြန်မာမွတ်စလင်များကို ဧည့်သည်များ၊ နိုင်ငံခြားသား ကုလားများအဖြစ်၎င်း၊ မြန်မာပြည်၏ ဖွဲ့စည်းအုပ်ချုပ်ပုံ အခြေခံဥပဒေ မှန်သမျှတွင် နိုင်ငံတော်၏ ကိုးကွယ်ရာ ဘာသာတစ်ခုအဖြစ် အစဉ်ထည့်သွင်း အသိအမှတ်ပြုခံရသော အစ္စလာမ်သာသနာကို နိုင်ငံခြားဘာသာ၊ ဧည့်သည်ဘာသာအဖြစ်၎င်း၊ အခြေအမြစ်မဲ့ ဗရမ်းဗတာ ပြောဆိုရေးသား၊ ဝါဒဖြန့်နေခြင်းများကိုလည်း ပြင်းထန်စွာ ရှုံ့ချလိုက်သည်။

၃။ ဒုတိယကမ္ဘာစစ်အပြီးတွင် မြန်မာနိုင်ငံသည် အာရှမှာ ဂျပန်ကလွဲလျှင် တိုးတက်ဖွံ့ဖြိုးမှု အလားအလာ အကောင်းဆုံးနိုင်ငံအဖြစ် ကုလသမဂ္ဂမှ အသိအမှတ်ပြုခဲ့သော်လည်း ကိုယ့်နိုင်ငံသားအချင်းချင်း တိုက်ခိုက်နေကြသော အနှစ်(၆၀)ကျော် ပြည်တွင်း ပဋိပက္ခပေါင်းစုံကြောင့် ကမ္ဘာ့အဆင်းရဲဆုံး နိုင်ငံအဖြစ်သို့ ကျဆင်းခဲ့ရသည်။ အဖက်ဖက်မှ အောက်ကျ နောက်ကျဖြစ်နေသော အမိနိုင်ငံတော်ကို ကမ္ဘာ့နိုင်ငံများနှင့် ပြန်လည် ရင်ဘောင်တန်းနိုင်ရေးအတွက် အရှိန်အဟုန်ဖြင့် ညီညီညွတ်ညွတ် ထူထောင်ကြရန် ရှားရှားပါးပါး အခွင့်အလမ်းတစ်ရပ် ပေါ်ပေါက်လာသည့် ယခုလို ကာလမျိုးတွင်ပင် ဝမ်းနည်းကြေကွဲဖွယ်ရာ အတိတ်က အဖြစ်ဆိုးများကို သင်္ခန်းစာ မယူနိုင်သေးဘဲ ကိုယ့်ပြည်တွင်းရှိ စွမ်းအားစုများ (Resources)ကို အလဟသ ပြုန်းတီးစေသော ဘာသာရေး၊ လူမျိုးရေး ပဋိပက္ခများကို အသစ်တစ်ဖန် ဖန်တီးနေခြင်းသည် အင်မတန်မှ အမျှော်အမြင် နည်းပါးရာ ကျလှပေသည်။
၃။ ကျွန်ုပ်တို့ တိုင်းရင်းသားမြန်မာမွတ်စလင်များသည် ဗုဒ္ဓဘာသာနှင့် ဆရာတော်၊ သံဃာတော်များကို အထူးလေးစား ကြည်ညိုသူများဖြစ်ကြသကဲ့သို့ မိမိတို့ ယုံကြည်ကိုးကွယ်ရာ အစ္စလာမ်သာသနာကို အေးချမ်းစွာ ကျင့်သုံးနေလိုသူများဖြစ်သည်။ မိမိတို့သည် ဘာသာရေး၊ လူမျိုးရေးအဓိကရုဏ်းများ ဖန်တီးလိုသူ အစွန်းရောက်များ စွပ်စွဲသကဲ့သို့ အစ္စလာမ်သာသနာကို မတော်မတရား လွှမ်းမိုးဖြန့်ချိလိုသူများ မဟုတ်သလို၊ မြန်မာပြည်သူအများစု ကိုးကွယ်သော ဗုဒ္ဓဘာသာ၏ အထူးဝိသေသများကိုလည်း လေးစား အသိအမှတ်ပြုသူများဖြစ်သည်။

၎။ ထို့ကြောင့် တိုင်းပြည်အေးချမ်းရေး၊ ဖွံ့ဖြိုးတိုးတက်ရေး၊ တရားဥပဒေစိုးမိုးရေး၊ လူမျိုးပေါင်းစုံ ဘာသာပေါင်းစုံ ချစ်ကြည်ရေး၊ အပြန်အလှန် ချစ်ကြည်လေးစားရေးတို့အတွက် ကျွန်ုပ်တို့မြန်မာမွတ်စလင်များသည် ဆရာတော် သံဃာတော်များ၊ ဘာသာပေါင်းစုံ ဘာသာရေးခေါင်းဆောင်များ၊ တိုင်းရင်းသားပေါင်းစုံ ပြည်သူလူထုများနှင့် ဆတက်ထမ်းပိုးတိုး၍ ပူးပေါင်းဆောင်ရွက်သွားမည်ဖြစ်၏။


မြန်မာမွတ်စလင် အစည်းအရုံး
ဧပြီလ (၂၉)၊ ၂၀၁၂

Media Contact; ကိုကျော်စွာ +44 782 842 6801(UK) kyawzwa@b-m-a.org; ဒေါ်မော်လီ +1 306 242 4536 Canada law4women@gmail.com; Ma Yasmin +1 408 250 6227(USA) yasnohana@sbcglobal.net;

Write A Comment

Rohingya Exodus