မြောက်ပိုင်းတွင် ကြွေလွင့်သွားသော ကျောင်းသားများ အမှတ်တရနေ့
ကိုမြအေး (၈၈ မျိုးဆက်ကျောင်းသားခေါင်းဆောင်) နှင့် အင်တာဗျူး"
မန္တလေးကို တက်လာတာဟာ ၈၈ မျိုးဆက် ကျောင်းသားများရဲ့ မစ်ရှင်အနေနဲ့ ကျနော် တက်လာတာပါ။ ကျနော်ကိုယ်တိုင် မြောက်ပိုင်းကိုရောက်ခဲ့ဖူးသူတယောက် အနေနဲ့ ဒီပွဲကို တက်ရောက်လာတာ ဖြစ်ပါတယ်။ အဲ့တော့ ကိုထွန်းအောင်ကျော်ကို ကျနော့် အနေနဲ့ ကောင်းကောင်းကြီး သိပါတယ်။ အလားတူပဲ ရန်ကုန်ကနေသွားတဲ့ ကိုမောင်မောင်ကြွယ်ကိုလဲ ကောင်းကောင်းကြီး သိပါတယ်။ ကျနော် ရဲရဲတင်းတင်း ပြောရဲပါတယ်။ သူတို့ဟာ ထောက်လှမ်းရေးတွေ မဟုတ်ပါဘူး၊ ကျောင်းသားတွေပါ။ ကျနော့်အသက်နဲ့ ပုံလောင်းပြီးတော့ ကျနော် ဒီကနေ့ ပြောရဲပါတယ်"
ဖေဖော်ဝါရီလ ၁၂ ရက်နေ့မှာ မန္တလေးတိုင်းဒေသကြီး မန္တလေးမြို့ မြ၀တီကျောင်းတိုက်မှာ ကျင်းပတဲ့ မြောက်ပိုင်းတွင် ကြွေလွင့်သွားသော ကျောင်းသားများ အမှတ်တရနေ့မှာ ပန်းချီဆရာ ဆူးမြင့်သိန်းက Tomorrow Performance အမည်နဲ့ မြောက်ပိုင်း ABSDF ကျောင်းသားတပ်မှာ ဖြစ်ပွားခဲ့တဲ့ အခြေအနေဖြစ်စဉ် စိတ်ခံစားမှုတွေကို ဖော်ကျူးပြသတဲ့ သရုပ်ဖော်ပြကွက်ကို ခင်းကျင်းပြသခဲ့ပါတယ်။ ဒီ သရုပ်ဖော် အခမ်းအနားကို မြောက်ပိုင်းဒေသမှာ ပါဝင် ပတ်သတ်ခဲ့တဲ့ ကျောင်းသားတွေ၊ စိတ်ပါဝင်စားသူတွေနဲ့ နိုင်ငံရေးအကျဉ်းသားဟောင်းတွေ တက်ရောက်ခဲ့ပါတယ်။ သရုပ်ဖော် ပြကွက်ကိုတော့ မနက် ၉း၃၀ ကနေ စတင်ခဲ့တာဖြစ်ပြီး မနက် (၁၀း၁၀) မိနစ်ခန့်မှာ ပြီးဆုံးခဲ့ပါတယ်။ တစ်ဆက်တည်းမှာပဲ ကျဆုံးသွားတဲ့ ABSDF ကျောင်းသားရဲဘော်တွေအတွက် ရည်စူးပြီး မနက် (၁၀း၃၀) မှာတော့ သံဃာတော် အရှင်သူမြတ်တွေကို နေ့ဆွမ်း ဆက်ကပ် လှူဒါန်းခဲ့ပါတယ်။
Source : Burma VJ
